web analytics

From around the world

ಪ್ರವೀಣ್ ತಾವ್ರೊ, ಕುಲ್ಶೇಕರ್
             
+971 50 7554105
ತುಮ್ಚ್ಯಾ ಗಮನಾಕ್:
Best be viewed in 1366 X 768 screen resolution and in Google Chrome

ದಾಯ್ಜಿ ದುಬಾಯ್ - ಖಾಡಿ ಗಾವಾಂತ್ ಕೊಂಕ್ಣೆಚೊ ಭರ್ವಸೊ

Tuesday, April 5, 2016  /  By Admin

ಬರಯ್ಣಾರಾ ವಿಶಿಂ ಜಾಣಾ ಜಾ...

80.5
User Rating
ಕಾಂಯ್ 17-18 ವರ್ಸಾಂ ಆದಿಂ ಖಾಡಿ ಗಾಂವಾಂತ್ ಕಾಮ್ ಕರ್ತೆಲ್ಯಾ ಕೊಂಕ್ಣಿ ಮೊಗಿಂಕ್ ಅಶೆಂ ಎಕ್ ಅವ್ಯಕ್ತ್  ಭ್ಯೆಂ ಆಸ್‍ಲ್ಲೆಂ ಕಿ ಕಾಂಯ್ ಆಪ್ಲಿ ಮಾಂಯ್‍ಭಾಸ್ ಕೊಂಕ್ಣಿ ಮೊರ್ತಾ ಕೊಣ್ಣಾ ಮುಣೊನ್. ಆನಿ ಹಾಕಾ ಕಾರಣಾಂ ಯಥೇಷ್ಟ್ ಆಸ್‍ಲ್ಲಿಂ. ವಾಹನ್ ಸೌಕರ್ಯ್ ಉಂಚ್ಲ್ಯಾ ಸ್ಥಿತೆರ್ ನಾತ್ಲ್ಲ್ಯಾ ನ್ ಎಕಾಮೆಕಾಕ್ ಭೆಟ್ಚೆ ಆವ್ಕಾಸ್ ಉಣೆ ಆಸ್‍ಲ್ಲೆ. ಆಪ್ಲೆಂ ಕಾಮ್ ಜಾಲೆಂ ಆನಿ ಆಪ್ಲೊ ವಸ್ತೆ ಜಾಗೊ ಜಾಲೊ ತಿತ್ಲೊಚ್. ಇಗರ್ಜೆ ಬಾಗ್ಲಾರ್ ಗೆಲ್ಯಾರ್ ಇಂಗ್ಲಿಷ್ ಸೊಡ್ನ್ ಹೆರ್ ಕಿತೆಂಚ್ ಆಯ್ಕಾನಾತ್‍ಲ್ಲೆಂ. ಈಟ್ ಇಂಗ್ಲೀಷ್, ಟಾಕ್ ಇಂಗ್ಲಿಷ್, ಸ್ಲೀಪ್ ಇಂಗ್ಲೀಷ್, ಆಂಗಾರ್ ಹುನ್ ಉದಾಕ್ ಪೊಡ್ಲ್ಯಾರ್ ಮಾತ್ರ್ ಮೆಲಿಂ ಮಾಂಯ್ - ಹಿ ಆಮ್ಚ್ಯಾ ಲೊಕಾಚಿ ಪರಿಸ್ಥಿತಿ ಜಾವ್ನಾಸ್‍ಲ್ಲಿ, ಕೊಂಕ್ಣಿ ಕಾರ್ಯಿಂ ಜಾಯ್ನಾತ್ಲ್ಲಿಂ. ಜಾಲ್ಯಾರೀ ಆಯೋಜಕಾಂ ಥಾವ್ನ್ ಕೊಂಕ್ಣಿ ಶಬ್ಢ್ ಭಾಯ್ರ್ ಪಡಾನಾತ್‍ಲ್ಲೆ, ಆನಿ ಹೆಚ್ ಆಯೋಜಕ್ ತಾಣಿ ಆಯೋಜಿತ್ ಕೆಲ್ಲ್ಯಾ ಕಾರ್ಯಾಕ್ ಕೊಂಕ್ಣೆಚ್ಯಾ ಮೊಗಾನ್ ಆಯಿಲ್ಲ್ಯಾ ಆಭಿಮಾನಿಂಕ್  ಅವ್ಮಾನಾಚ್ಯಾ ದೃಷ್ಟಿನ್ ದೆಖ್ತೆಲೆ. ಆನಿ ಖಂಡಿತ್ ಜಾವ್ನ್ ಕೊಂಕ್ಣಿ ಆಯಾ, ಡ್ರೈವರಾಂಚಿ ಭಾಸ್ ಮುಣ್ಚ್ಯಾಕ್ ಸಾಕ್ಸ್ ದಿತಾಲೆ ಹೊ ವಿಂಚ್ಣಾರ್ ಕುಳಿಯೆಚೊ ಲೋಕ್.

ಹ್ಯೆ ವೆಳಾರ್ ದುಬಾಯ್ ಶಹರಾಕ್ ಪೊಟಾಚ್ಯಾ ಗ್ರಾಸಾ ಕಾತಿರ್ ದೊಗಾಂ ತರ್ನಾಟ್ಯಾಂಚೆಂ ಯೆಣೆ ಜಾಲೆಂ. ಆನಿ ತೆ ಜಾವ್ನಾಸ್‍ಲ್ಲೆ ನಾಂವಾಡ್ದಿಕ್ ಸಂಘಟಕ್ ಡಯಾನ್ ಡಿ'ಸೋಜಾ ಮುಕಾಮರ್ ತಶೆಂಚ್ ಕೊಂಕ್ಣೆಚೊ ಬಿಲ್ ಗೇಟ್ಸ್ ಮುಳ್ಳ್ಯಾ ಖ್ಯಾತೆಚೊ ವಾಲ್ಟರ್ ಡಿ'ಸೋಜಾ ನಂದಳಿಕೆ. ತಾಂಕಾಂ ಆಸ್‍ಲ್ಲೊ  ಕೊಂಕ್ಣೆಚೊ ಮೋಗ್ ಆನಿ ಕೊಂಕ್ಣೆ ವಯ್ರ್ ಆಸ್‍ಲ್ಲಿ ದೂರ್‌ದೃಷ್ಟಿ ಎಕ್ ದೈರಾಧಿಕ್ ಮೇಟ್ ಕಾಡುಂಕ್ ಪ್ರಚೋದಿತ್ ಕರ್ತಾ. ತ್ಯಾ ಆಯಿನ್ನ್ ವಗ್ತಾ ತಾಂಕಾಂ ತಸಲ್ಯಾಚ್ ದೂರ್‌ದೃಷ್ಟಿನ್ ಶಿಜೊನ್ ಆಸ್ಚ್ಯಾ ಹೇಮಾಚಾರ್ಯಾ, ಸ್ಟೇನಿ ಪಿಂಟೊ ನೀರುಡೆ ಆನಿ ಮೆಲ್ವಿನ್ ರೊಡ್ರಿಗಸ್ ಹಾಂಚೊ ಸಾಂಗಾತ್ ಮೆಳ್ತಾ. ಆನಿ ಹೆ 'ಪಂಚ ಪಾಂಡವ್' ಸಾಂಗಾತಾ ಮೆಳೊನ್ ಆಪ್ಲ್ಯಾ ಬರ್‍ಯಾಪಣಾ ಖಾತಿರ್ ನಂಯ್, ದುಡ್ವಾಚ್ಯಾ ಆಶೆನ್ ನಂಯ್, ಬಗಾರ್ ಫಕತ್ ಕೊಂಕ್ಣೆಚ್ಯಾ ಮೊಗಾನ್ ಘಡ್ತಾತ್ ಎಕ್ ಸಂಸ್ಥೊ 'ದಾಯ್ಜಿ ದುಬಾಯ್'.

'ದಾಯ್ಜಿ ದುಬಾಯ್' ಹಾಚಿ ಸುರ್ವಾತ್ ಜಾಲ್ಲಿಚ್ ಯು.ಎ.ಇಂತ್ ಆಸ್‍ಲ್ಲೆ  ಸಭಾರ್ ಲೇಖಕ್ ಹಾಚೆ ಸಾಂದೆ ಜಾಲೆ ಆನಿ ಗಲ್ಫಾಂತ್ ಕೊಂಕ್ಣೆಚಿ ಕ್ರಾಂತಿ ಕರುಂಕ್ ಎಕಾಮೆಕಾ ಸಾಂಗಾತ್ ದಿಂವ್ಕ್ ಲಾಗ್ಲೆ. ಪರಿಣಾಮ್ ಜಾವ್ನ್ ಬದ್ಲಾವಣೆಚೆ ವಾರೆಂ ಗಲ್ಫಾಂತ್ ಜ್ಯೊರಾನ್ ವ್ಹಾಳೊಂಕ್ ಲಾಗ್ಲೆಂ. ಜೊ ಲೋಕ್ ಕೊಂಕ್ಣೆಂತ್ ಉಲೊಂವ್ಕ್ ಲಜೆತಾಲೊ ತೊ ಕೊಂಕ್ಣಿ ಉಲೊಂವ್ಕ್ ಲಾಗ್ಲೊ. ಕಿತ್ಯಾಕ್ ಮುಳ್ಳ್ಯಾರ್ ಕೊಂಕ್ಣಿ ಉಲೊಂವ್ಕ್ ಕಳಿತ್ ಆಸೊನ್ ಲಜೆಂವ್ಚ್ಯಾ ಮನ್ಶ್ಯಾಂಕ್ ಆಜ್ ಕೊಂಕ್ಣಿ ಉಲೊಂವ್ಚೊ ಲೋಕ್ ತಿರಸ್ಕಾರಾಚ್ಯಾ ದೃಷ್ಟೆನ್ ಪಳೆಂವ್ಕ್ ಲಾಗ್ತಾನಾ ತಾಂಚ್ಯಾ ಲಾಗಿಂ ಕೊಂಕ್ಣಿ ಉಲಯ್ನಾಸ್ತಾನಾ ರಾವೊಂಕ್ ವಾಟ್ ನಾತ್‍ಲ್ಲಿ. ಹೆಂ ಕೊಂಕ್ಣೆಚೆ ವ್ಹಾರೆಂ ಇತ್ಲೆಂ ದರಬಸ್ತ್ ಆಸ್‌ಲ್ಲೆಂಗಿ ಖಾಡಿ ಗಾವಾಂತ್ಲ್ಯಾ ಹೆರ್ ದೆಶಾಂಕ್ ಆಪ್ಟೊಂಕ್ ಚಡ್ ವೇಳ್ ಲಾಗೊಂಕ್ ನಾ. ಜಾಯ್ತೆ ಕಲಾವಿದ್ ಆನಿ ಸಂಗೀತ್ಗಾರ್ ತಾಂಚಿಂ ತಾಲೆಂತಾಂ ಹಾಂಗಾ ಪ್ರದರ್ಶಿತ್ ಕರುಂಕ್ ಚಡ್ ಆನಿ ಚಡ್ ಕರ್ನ್ ಯೇಂವ್ಕ್ ಲಾಗ್ಲೆ. ಕೊಂಕ್ಣೆಚೆಂ ಮಿಸಾಂವ್ ಧರ್‌ಲ್ಲ್ಯಾ ಹರ್ಯೆಕ್ ಮನ್ಶ್ಯಾಕ್ ದಾಯ್ಜಿ ದುಬಾಯ್ ಎಕ್ ಭರ್ವಾಷ್ಯಾಚೆಂ ಕೀರ್ಣ್ ಜಾಂವ್ಕ್ ಪಾವ್ಲೆಂ. ಮಾಂಡ್ ಸೊಭಾಣ್ ತಸಲ್ಯಾ ಪಂಗ್ಡಾಕ್ ಆನಿ ಎರಿಕ್ ಒಝೆರಿಯೊ ತಸಲ್ಯಾ ಮುಖೇಲ್ಯಾಕ್ ಗಲ್ಫಾಂತ್ ತಾಂಚ್ಯಾ ಮಿಸಾಂವಾಂಚಿ ವ್ಹಳೊಕ್ ಕರುನ್ ದಿಂವ್ಕ್ ಆನಿ ಹಾಂಗಾಚ್ಯಾ ಲೋಕಾಕ್ ಮನದಟ್ಟ್ ಕರುಂಕ್ ಡಯಾನ್ ಡಿ'ಸೋಜಾಚ್ಯಾ ಮುಖೆಲ್ಪಾಣಾರ್ ದಾಯ್ಜಿ ದುಬಾಯ್ ಪಂಗ್ಡಾನ್ ಜಾಯ್ತಿ ಮ್ಹಿನತ್ ಘೆತ್ಲ್ಯಾ.

. ಕೊಂಕ್ಣಿ ಸಾಹಿತ್ಯ್ ಆನಿ ಸಂಸ್ಕ್ರತೆಚಿ ಪ್ರಗತಿ
. ಕೊಂಕ್ಣಿ ಸಾಹಿತ್ಯ್‌ಕಾರಾಂಚಿ ಬಹುಮುಖಿ ಉದರ್ಗತಿ
. ಸಮಾಜೆಂತ್ ಕೊಂಕ್ಣಿ ಜಾಗ್ರತಿ
. ಅಂತರಾಷ್ಟ್ರೀಯಿ ಸ್ಥಾನಾರ್ ಕೊಂಕ್ಣಿ ಭಾಷೆಕ್ ಮಾನ್ ಮರ್‍ಯಾದ್
. ಮುಕ್ಲ್ಯಾ ಪಿಳ್ಗೆಗ್ ಕೊಂಕ್ಣಿ ಸಾಹಿತ್ಯ್ ಆನಿ ತಿಚೆ ಅಸ್ಮಿತಾಯೆಚಿ ವಳಕ್
. ಹೆ ವಯ್ಲೆ ಇರಾದೆ ಜ್ಯಾರಿ ಕರ್‍ಚಾ ಬಾಬ್ತಿನ್ ಆಧುನಿಕ್ ಆನಿ ವೆಗ್ಯಾನಿಕ್ ಉಪಲಬ್ಧಿಂಚೊ ಬರೊ ಆನಿ ಖರೊ ಉಪ್ಯೋಗ್.

ಹ್ಯೆ ವಯ್ಲಾ ದಿಷ್ಟಾವ್ಯಾ ಸಾಂಗಾತಾ ಕೊಂಕ್ಣೆಚೆಂ ಮಿಸಾಂವ್ ಮುಂದರ್ಸುನ್ ವರ್ಚ್ಯಾ ದಾಯ್ಜಿ ದುಬಾಯ್ ಸಂಸ್ಥ್ಯಾಚೆಂ ಯೆದೊಳ್ ಪರ್‍ಯಾಂತ್ ಪಾಂಚ್ ಸಂಚಾಲಕಾಂನಿ ಸುಂಕಾಣ್ ಸಾಂಬಾಳ್ಳಾಂ. ತಾಂಚಿಂ ನಾಂವಾಂ ಹ್ಯೆ ಪರಿಂ ಆಸಾತ್: ಡಯಾನ್ ಡಿ'ಸೋಜಾ ಮುಕಮಾರ್, ಸ್ಟೀವನ್ ಮಸ್ಕರೇನ್ಹಸ್ (ಹೇಮಾಚಾರ್ಯ), ಸ್ಟೇನ್ ಆಗೇರಾ ಮುಲ್ಕಿ, ಸ್ಟೇನಿ ಪಿಂಟೊ ನೀರುಡೆ , ರೊನಿ ಬೈಂದೂರ್ ಆನಿ ಪ್ರಸ್ತುತ್ ರೊಬರ್ಟ್ ಫೆರ್ನಾಂಡಿಸ್ ಉದ್ಯಾವರ್.

ಆಶೆಂ ದಾಯ್ಜಿ ದುಬಾಯ್ ಸಂಸ್ಥೊ ದುಬಾಯಾಂತ್ ಸತ್ರಾ ವರ್ಸಾಂ ಆದಿಂ ಆಸ್ಥಿತ್ವಾಕ್ ಆಯ್ಲ್ಯಾ ಉಪ್ರಾಂತ್ ಖಾಡಿಗಾಂವಾನಿ ಕೊಂಕ್ಣೆಚಿ ಏಕ್ ಕ್ರಾಂತಿಚ್ ಜಾಲ್ಯಾ ಮ್ಹಣ್ಚ್ಯಾಕ್ ಹ್ಯಾ ಪ್ರದೇಶಾಂತ್ಲೊ ಪಾಟ್ಲ್ಯಾ ಸೊಳಾ ವರ್ಸಾಂಚೊ ಕೊಂಕ್ಣಿ ಇತಿಹಾಸ್‍ಚ್ ಸಾಕ್ಸ್ ಜಾವ್ನಾಸಾ. ಖಾಡಿ ದೇಶಾನಿಂ ಆನಿ ಸಂಸಾರ್ ಭರ್ ದಾಯ್ಜಿ ದುಬಾಯ್ ಸಂಸ್ಥ್ಯಾನ್ ಕೊಂಕ್ಣೆಚಿ ಕ್ರಾಂತಿ ಮಾತ್ರ್ ಕರಿನಾಸ್ತಾನಾ, ಕೊಂಕ್ಣೆಂತ್ಲ್ಯಾ ಗರ್ಜೆವಂತ್ ವಾವ್ರಾಡ್ಯಾಂಕ್ ಸದಾಂಚ್ ಕುಮ್ಕೆಚೊ ಸಹಕಾರ್ ದಿಲಾ. ಕೊಂಕ್ಣಿ ಲೇಖಕಾಂಚೆ ನವೆಂ ಬೂಕ್ ಪ್ರಕಾಶಿತ್ ಕರ್ತಾನಾ ಯೆಂವ್ಚ್ಯಾ ಮನವೆಂಕ್ ಚಡಾವತ್ ಆರ್ಥಿಕ್ ಸಹಕಾರ್ ದಿಲಾ. ಲೇಖಕ್, ಕವಿ, ಪದಾಂ ಘಡ್ಣಾರ್, ನಾಟಕಿಸ್ತ್ ಹಾಂಚೊ ಕೊಂಕ್ಣೆಂತ್ಲೊ ವಾವ್ರ್ ಒಳ್ಕೊನ್ ತಾಂಕಾ ಪರ್ಗಟ್ ಮಾನ್ ಕೆಲಾ. ಕೊಂಕ್ಣೆಂತ್ ಖಳನಾಸ್ತಾಂ ಲಾಂಬಾಯೆಚಿ ಸೆವಾ ದಿಲ್ಲ್ಯಾ ಲೇಖಕಾಂಕ್ ಪಾಟ್ಲ್ಯಾ 16 ವರ್ಸಾನಿಂ ಖಳನಾಸ್ತಾಂ 16 ಮಾಲ್ಘಡ್ಯಾ ಲೇಖಕಾಂಕ್ ಸಂಸಾರ್ ಭರ್ ಪ್ರಖ್ಯಾತ್ ಜಾಲ್ಲೊ 'ದಾಯ್ಜಿ ದುಬಾಯ್ ಸಾಹಿತಿಕ್ ಪುರಸ್ಕಾರ್' ಸಾಂಗಾತಾ ಯಾದಿಸ್ತಿಕಾ, ಮಾನ್ ಪತ್ರ್, ಆನಿ ನಗ್ದೆನ್ ಪನ್ನಾಸ್ ಹಜಾರ್ ರುಪಯ್ ದೀವ್ನ್ ಮಾನ್ ಕೆಲಾ. ಸಂತೋಸಾಚಿ ಖಬರ್ ಜಾವ್ನ್ ಆದ್ಲ್ಯಾ ವರ್ಸಾ ಥಾವ್ನ್ ಪುರಸ್ಕಾರಾಚೊ ಐವಜ್ ಪಾವಣ್ಶೆಂ ಹಜಾರ್ ರುಪಯಾಂಕ್ ಚಡಯ್ಲಾ. ಪಾಟ್ಲ್ಯಾ ಸತ್ರಾ ವರ್ಸಾಂ ಥಾವ್ನ್ ಕೇಂದ್ರಿಯ್ ಆಕಾಡೆಮಿ ಪುರಸ್ಕಾರಾಕ್ ಸರಿ ಜಾಲ್ಲ್ಯಾ ಹ್ಯಾ ಪುರಸ್ಕಾರಾನ್ ಗೌರವಾನ್ವಿತ್ ಜಾಲ್ಲೆ ಸಾಹಿತಿ ಹ್ಯೆ ಪರಿ ಆಸಾತ್ :

ಸಿರಿಲ್ ಜಿ ಸಿಕ್ವೇರಾ(ಸಿಜ್ಯೆಸ್ ತಾಕೊಡೆ)-2000
ಜೆ.ಸಿ ವೇಗಸ್(ಸಿರಿವಂತ್)-2001
ಗ್ಲ್ಯಾಡಿಸ್ ರೇಗೊ-2002
ಎಡ್ವಿನ್ ಜೆ.ಎಫ್ ಡಿ ಸೋಜಾ-2003
ಜೆರಿ ಕುಲ್ಶೇಕರ್-2004
ಜೆ.ಬಿ ಮೊರಾಯಸ್-2005; ಸನ್ನಿ ಎ.ಡಿ ಸೋಜಾಕ್ ಅಭಿನಂದನ್ ಪುರಸ್ಕಾರ್
ವಿಕ್ಟರ್ ರೋಡ್ರಿಗಸ್-2006
ವಿಲ್ಫಿ ರೆಬಿಂಬಸ್-2007
ಎಡಿ ನೆಟ್ಟೊ-2008
ಡೊಲ್ಫಿ ಕಾಸ್ಸಿಯಾ-2009; ನೆಲ್ಲು ಪೆರ್ಮನ್ನೂರಕ್ ಅಭಿನಂದನ್ ಪುರಸ್ಕಾರ್
ಲ್ಯಾನ್ಸಿ ಪಿಂಟೊ ನಾಯಕ್-2010
ಜೆರಿ ನಿಡ್ಡೋಡಿ-2011
ಹೆರೊಲ್ಪಿಯುಸ್-2012
ಎಡ್ವರ್ಡ್ ನಜ್ರೆತ್-2013
ಸ್ಟೇನ್ ಅಗೇರಾ-2014
ಮನು ಬಾಹ್ರೇಯ್ನ್-2015
ಮೆಲ್ವಿನ್ ರೋಡ್ರಿಗಸ್-2016

ಹ್ಯಾ ಭಾಯ್ರ್ ಕರ್ನಾಟಕ್ ಸರ್ಕಾರಾ ಅಧೀನ್ ಆಸ್ಚ್ಯಾ ಕೊಂಕಣಿ ಸಾಹಿತ್ ಅಕಾಡೆಮಿ ಥಾವ್ನ್ ಯೆದೊಳ್ ಸಾತ್ ದಾಯ್ಜಿ ಸಾಂದ್ಯಾಂಕ್ ಅಕಾಡೆಮಿ ಪುರಸ್ಕಾರ್ ಲಾಭ್ಲಾ. ತೆ ಹ್ಯೆ ಪರಿ ಅಸಾತ್.
ಸ್ಟೇನ್ ಅಗೇರಾ ಮುಲ್ಕಿ, ಮೆಲ್ವಿನ್ ರೋಡ್ರಿಗಸ್, ಸಿಜ್ಯೆಸ್ ತಾಕೊಡೆ, ಎಂಪಿ ರೋಡ್ರಿಗಸ್, ಆನ್ಸಿ ಪಾಲಡ್ಕ, ಜೆಮ್ಮಾ ಪಡೀಲ್ ಆನಿ ಕಿಶೂ ಬಾರ್ಕೂರ್.

ದಾಯ್ಜಿ ದುಬಾಯ್ ಸಂಸ್ಥ್ಯಾಚಿ ಪಾಟ್ಲ್ಯಾ ಸತ್ರಾ ವರ್ಸಾಂಚಿ ಸಂಪೂರ್ಣ್ ಝಳಕ್ :

ದಾಯ್ಜಿ ವರಸ್-2000
  • ಜನೆರ್ ಮಹಿನ್ಯಾಂತ್ ದಾಯ್ಜಿ  ದುಬಾಯ್ಚ್ಯಾ ಪಯ್ಲ್ಯಾ ವರ್ಸುಗೆಚಾ ದಿಸಾಚೆಂ ಆಚರಣ್.
  • ಗಲ್ಫಾಂತ್ ಪಯ್ಲೆಂ ಪಾವ್ಟಿಂ ಕೊಂಕ್ಣಿ ಪುಸ್ತಕ್ ಪ್ರದರ್ಶನ್ ಅಸಾ ಕರ್ನ್ ದಾಯ್ಜಿ ದುಬಾಯ್ನ್ ಖಾಡಿ ಗಾಂವಾಚಾ ಕೊಂಕ್ಣಿ ಇತಿಹಾಸಾಂತ್ ವಿಶೇಸ್ ಧಾಕ್ಲೊ ರಚ್ಲೊ.
  • 'ಝೆಲೊ' ಕೊಂಕ್ಣಿ ಮ್ಹಯ್ನ್ಯಾಳ್ಯಾ ಪತ್ರಾಕ್ ಆರ್ಥಿಕ್ ಮಜತ್ ದಿಂವ್ಚ್ಯಾ ಉದ್ದೇಶಾನ್ ಮಾನೆಸ್ತ್ ಹೇಮಾಚಾರ್ಯಚಾ ಸಂಪಾದಕ್ಪಣಾಖಾಲ್  'ಝೆಲೊ2000' ವಿಶೇಸ್ ಅಂಕೊ ಉಗ್ತಾವಣ್ ಜಾಲೊ.
  • ಸಾಹಿತಿ ಆನ್ಸಿ ಪಾಲಡ್ಕಚಾ ಮುಖೇಲ್ಪಣಾಖಾಲ್ ಕವಿಗೋಶ್ಟಿ
  • ಸಾಹಿತಿ ಆನಿ ನಾಟಕ್‍ಕಾರ್ ಸಿಜ್ಯೆಸ್ ತಾಕೊಡೆ ಹಾಚಾ 'ಮ್ಹಯ್ನ್ಯಾಚಿ ಪಯ್ಲಿ ತಾರಿಕ್' ಮ್ಹಳ್ಳ್ಯಾ ನಾಟಕಾಚೆಂ ಸಾದರ್ಪಣ್
  • ಆನ್ಸಿ ಪಾಲಡ್ಕಾಕ್ ಡೊ| ಟಿ.ಎಮ್.ಎ.ಪೈ ಫೌಂಡೇಶನ್ ಥಾವ್ನ್ ತಾಚ್ಯಾ ಪುಸ್ತಕಾಕ್ ಆಭಿನಂದನ್ ಪುರಸ್ಕಾರ್

ದಾಯ್ಜಿ ವರಸ್-2001
  • ಜನೆರ್ 24 ತಾರಿಕೆರ್ ಸ್ಥಾಪನಾಚಾ ದುಸ್ರ್ಯಾ ವರ್ಸುಗೆಚೆಂ ಆಚರಣ್
  •  ಸಿಜ್ಯೆಸ್ ತಾಕೊಡೆಚಾ ಸಂಪಾದಕ್ಪಣಾಖಾಲ್ 'ದಿವೊ ವಿಶೇಸ್ ಆಂಕ್ಯಾ'ಚೆಂ ಲೋಕಾರ್ಪಣ್
  • ಮೆಲ್ವಿನ್ ರೋಡ್ರಿಗಸಾಚಾ ಮುಖೇಲ್ಪಣಾಖಾಲ್ ಪಂಚಭಾಷಾ ಕವಿಗೋಶ್ಟಿ
  • ಮಾಲ್ಘಡೊ ದಾಯ್ಜಿ ಸಾಹಿತಿ ಮಾನೆಸ್ತ್ ಲವ್ರೆತ್ ಚಿಕ್‍ಮಂಗ್ಳುರ್ ಹಾಕಾ ಸನ್ಮಾನ್
  • ದಾಯ್ಜಿದುಬಾಯ್.ಕೊಮ್ ಜಾಳಿಜಾಗೊ ಮಾನೆಸ್ತ್ ವಾಲ್ಟರ್ ನಂದಳಿಕೆ ಮುಖೆಲ್ಪಣಾಖಾಲ್ ಉಗ್ತಾವಣ್
  • ಜೆಮ್ಮಾ ಪಡೀಲಾಚಾ ಕಾಣಿಯಾಂಚೊ ಪುಂಜೊ 'ದುಖಾಂ' ಬುಕಾಚೆಂ ಲೋಕಾರ್ಪಣ್
  • ದಾಯ್ಜಿ ಸಾಂದ್ಯಾಂಥಾವ್ನ್  ಪರ್ಸಿ ಉರ್ವಾ ಹಾಚೊ 'ಇಜ್ಜು ಮರಿ ಜುಜೆ' ನಾಟಕಾಚೆಂ ಪ್ರದರ್ಶನ್

ದಾಯ್ಜಿ ವರಸ್-2002
  • ಜನೆರ್ 24 ತಾರಿಕೆರ್ ದಾಯ್ಜಿ ದುಬಾಯ್ಚೊ ತಿಸ್ರ್ಯಾ ವರ್ಸಾಚೊ ಸಂಭ್ರಮ್
  • ಮಾಲ್ಘಡೊ ದಾಯ್ಜಿ ಸಾಂದೊ, ನಾಟಕಿಸ್ತ್ ಫ್ರಾನ್ಸಿಸ್ ಫೆರ್ನಾಂಡಿಸ್ ಕಾಸ್ಸಿಯಾಕ್ ಸನ್ಮಾನ್
  • ಕಿಶೂ ಬಾರ್ಕೂರ್ ಹಾಚೊ ಮಟ್ವ್ಯಾ ಕಾಣಿಯಾಂ ಸಂಗ್ರಹ್  'ರುಪ್ಣಿಂ' ಲೋಕಾರ್ಪಣ್
  • ಮಾನೆಸ್ತ್ ವಿಲ್ಫಿ ರೆಬಿಂಬಸಾನ್ ಬರಯಿಲ್ಲ್ಯಾ ಸಂಗೀತ್ ನಾಟಕಾಚೆಂ ಪ್ರದರ್ಶನ್. ದಿಗ್ದರ್ಶನ್ - ಮನೋಹರ್ ಪಾಯ್ಸ್
  • ದಾಯ್ಜಿ ಸಾಂದ್ಯಾಂ ಥಾವ್ನ್ ಹೇಮಾಚಾರ್ಯನ್ ಬರವ್ನ್ ನಿರ್ದೇಶನ್ ದಿಲ್ಲ್ಯಾ 'ಘಾಂಟಿಚಿ ತೋರ್' ನಾಟಕಾಚೆಂ ಪ್ರದರ್ಶನ್.
  • ದಾಯ್ಜಿ ಸಾಂದೊ ನವೀನ್ ಸಿಕ್ವೇರಾ ಬ್ರಹ್ಮಾವರ್ ಹಾಚಿ ಕೊಂಕ್ಣೆಂತ್ಲಿ ಪಯ್ಲಿ ವಬ್‍ಸೈಟ್  www.maibhaas.com ಹಾಚೆಂ ಉಗ್ತಾವಣ್.

ದಾಯ್ಜಿ ವರಸ್-2003
  • ಮಾರ್ಚ್ 6 ತಾರಿಕೆರ್ ಚೊವ್ತ್ಯಾ ವಾರ್ಶಿಕ್ ದಿಸಾಚೆಂ ಆಚರಣ್
  • ಯು‌ಎ‌ಇಂತ್ಲ್ಯಾ ಕೊಂಕ್ಣಿ ಕವಿಂ ಥಾವ್ನ್ ಹಾಸ್ಯ್ ಕವಿಗೋಶ್ಟಿ
  • ಮೆಲ್ವಿನ್ ರೊಡ್ರಿಗಸಾನ್ ಸಂಪಾದನ್ ಕೆಲ್ಲೊ ಪನ್ನಾಸ್ ಕವಿಂಚಾ ಕವಿತಾಂಚೊ ಪುಂಜೊ 'ಕುಪಾಂ ಪಂದ್ಲಿಂ ಮುಖಾಂ' ಆನಿ ತಾಚ್ಯಾಚ್ ಲೇಖನ್  ಸಂಗ್ರಹಾಚೊ ಪುಂಜೊ 'ಶಬ್ದುಲಿಂ' ಆನಿ ಜುಡಿತ್ ಪಿರೇರಾನ್ ಬರಯಿಲ್ಲೊ ಕಾಣ್ಯೆ ಸಂಗ್ರಹ್ ಬೂಕ್ 'ಕೊಡು ಸತಾಂ'ಚೆ ಮೊಕ್ಳಿಕ್ಪಣ್
  • ಮಾಲ್ಘಡೊ ದಾಯ್ಜಿ ಸಾಹಿತಿ ಸ್ಟೇನಿ ಪಿಂಟೊ ನೀರುಡೆ ಹಾಕಾ ಸನ್ಮಾನ್
  • ದಾಯ್ಜಿ ಸ್ಥಾಪಕ್ ಸಂಚಾಲಕ್  ಡಯಾನ್ ಡಿ ಸೋಜಾ ಮುಕಾಮಾರ್ ಹಾಂಕಾಂ ತುಳು ಆನಿ ಕೊಂಕಣಿ ನಾಟಕ್ ಶೆತಾಕ್ ದಿಲ್ಲ್ಯಾ ಸೆವೆಖಾತಿರ್ ’ಕಲಾ ಸಂಗಮ್’ ಪ್ರಶಸ್ತೆಚೊ ಮಾನ್

ದಾಯ್ಜಿ ವರಸ್-2004
  •  ಜನೆರ್ 30 ತಾರಿಕೆರ್ ದಾಯ್ಜಿ ದುಬಾಯ್ಚೊ ಪಾಂಚ್ವೊ ವಾರ್ಶಿಕ್ ದೀಸ್ ಆಚರಣ್
  • ಗಲ್ಫಾಂತ್ಲ್ಯಾ ಇತಿಹಾಸಾಂತ್ ಪಯ್ಲೆಂ ಪಾವ್ಟಿಂ ಜಾವ್ನ್ ಯು‌ಎ‌ಇಂತ್ ಮಂಗ್ಳುರಿ ಕೊಂಕ್ಣಿ ಸಂಸ್ಥ್ಯಾಂ ಮಧೆಂ 'ಕೊಂಕ್ಣಿ ನಾಟಕ್ ಸ್ಪರ್ದೊ'. ಪಾಟಾಪಾಟ್ ದೋನ್ ಸುಕ್ರಾರಾನಿಂ ನೋವ್ ನಾಟಕಾಂಚೆ ಪ್ರದರ್ಶನ್ ಕರವ್ನ್ ಧಾಕ್ಲೊ
  • ಮಾಲ್ಘಡೊ ದಾಯ್ಜಿ ಸಾಹಿತಿ ಎಮ್.ಪಿ. ರೋಡ್ರಿಗಸ್ ಹಾಕಾ ಸನ್ಮಾನ್
  • ಮೆಲ್ವಿನ್ ರೊಡ್ರಿಗಸ್ ಹಾಚೊ ಕವಿತಾ ಪುಂಜೊ 'ವಾಟ್' ಲೋಕಾರ್ಪಣ್
  • ನವೆಂಬರ್ 14 ತಾರಿಕೆರ್ 'ಆಜ್ ಆಮಿ ಕೊಂಕ್ಣಿ ಉಲೊವ್ಯಾಂ' ಶಿಬಿರಸವೆಂ ಭುರ್ಗ್ಯಾಂಚೊ ದೀಸ್ ಆಚರಣ್. ದುಬಾಯಾಂತ್ಲ್ಯಾ ಪನ್ನಾಸಾಂ ವಯ್ರ್ ಭುರ್ಗ್ಯಾಂನಿ ಹ್ಯೆ ಶಿಬಿರಾಂತ್ ಪಾತ್ರ್ ಘೆತ್‍ಲ್ಲೊ
  • ಕೆನರಾ ಕೊಂಕ್ಣಿ ಕಥೋಲಿಕ್ ಹಾಂಚ್ಯಾ ಜಾಗತಿಕ್ ಸಮ್ಮೇಳಾಚೆಂ ಸೆಮಿನಾರ್ ದುಬಾಯಾಂತ್ ಅಸಾ ಕರ್ಚ್ಯಾಕ್ ಮಜತ್

ದಾಯ್ಜಿ ವರಸ್-2005
  • ಜನೆರ್ 28 ತಾರಿಕೆರ್ ಸಂಘಟನಾಚೊ ಸವೊ ವಾರ್ಶಿಕೋತ್ಸವ್ ಆಚರಣ್
  • ದುಬಾಯಾಂತ್ ಪಯ್ಲೆಂ ಪಾವ್ಟಿಂ ಮಾಂಡೊ ಆನಿ ದೆಕ್ಣಿ ಪ್ರದರ್ಶನಾಚೆಂ ಮುಖೇಲ್ಪಣ್
  • ಮಾಲ್ಘಡೊ ದಾಯ್ಜಿ ಸಾಹಿತಿ ಅಂತೋನ್ ಮೆಂಡೋನ್ಸಾಕ್ ಸನ್ಮಾನ್
  • ಆಂಡ್ರು ಡಿಕುನ್ಹಾ ಹಾಂಚೊ ಕವಿತಾ ಸಂಗ್ರಹ್ ಬೂಕ್  'ವ್ಹಳೂ ವ್ಹಳೂ ವ್ಹಾಳ್ ವ್ಹಾಳ್ಯಾ' ಆನಿ ಹೇಮಾಚಾರ್ಯಚಾ ಲೇಖನಾಂಚೊ ಪುಂಜೊ 'ಆಮ್ಚಿ ಮಾತಿ ಆಮ್ಚಿ ಮನ್ಶ್ಯಾಂ' ಲೋಕಾರ್ಪಣ್
  • ದಾಯ್ಜಿ ಸಾಂದ್ಯಾಂ ಥಾವ್ನ್ ಹೇಮಾಚಾರ್ಯಚಾ ನಿರ್ದೇಶಕ್ಪಣಾಖಾಲ್ ಚಾಫ್ರಾನ್ ಬರಯಿಲ್ಲೊ 'ಕುವಾಳ್ಯಾಚಿ ವಾಲ್' ನಾಟಕ್ ಪ್ರದರ್ಶನ್
  • ಜೂನ್ ಮಹಿನ್ಯಾಂತ್ ಹೇಮಾಚಾರ್ಯಚಾ ವ್ಹಡ್ ಆಸಕ್ತೆನ್, ಕೊಂಕ್ಣಿ ಮಾಂಚಿಯೆ ಕಲಾಕರಾಂಚೊ ಎಕ್ತಾರ್ 'ದಾಯ್ಜಿ ರಂಗ್ ಮಂದಿರ್' ಹಾಚೆಂ ಸ್ಥಾಪನ್
  • ಆಕ್ಟೋಬರ್ ಮಹಿನ್ಯಾಂತ್ ಕಾರ್ಯ ನಿರ್ವಾಹಕ್, ಸಂಪನ್ಮೂಲ್ ವೆಕ್ತಿ ಮಾನೆಸ್ತ್ ಮನೋಹರ್ ಪಾಯ್ಸ್, ಜೆರಿ ಡಿ ಮೆಲ್ಲೊ ಮಸ್ಕತ್ ಆನಿ ವಾಲ್ಟರ್ ನಂದಳಿಕೆ ಹಾಂಚೆ ಥಾವ್ನ್ ಸಾರ್ವಜನಿಕ್ ಉಲೊವ್ಪಾ ವಯ್ರ್ ಶಿಬಿರ್
  • ಮಾಲ್ಘಡೊ ಸಾಹಿತಿ ಆನಿ ನಾಟಕಿಸ್ತ್ ಸನ್ನಿ ಎ ಡಿ'ಸೋಜಾಕ್ ನಗ್ದೆನ್ 20,000 ರುಪಯ್ ಆಟಾಪ್ಚೊ  ಅಭಿನಂದನ್ ಪುರಸ್ಕಾರ್
  • ದಾಯ್ಜಿ ಯುವ ಸಾಂದೊ ಆರ್ಥರ್ ಪಿರೇರಾಕ್ ಕರ್ನಾಟಕ್ ರಾಜ್ಯ್ ಸರ್ಕಾರಾಥಾವ್ನ್ ಪ್ರತಿಶ್ಟಿತ್ 'ಸಮಾಜ್ ರತ್ನ' ಪ್ರಶಸ್ತಿ

ದಾಯ್ಜಿ ವರಸ್-2006
  • ಎಪ್ರಿಲ್ 21 ತಾರಿಕೆರ್ ಆಸ್ಥಿತ್ವಾಚ್ಯಾ ಸಾತ್ವ್ಯಾ ವಾರ್ಶಿಕ್ ದಿಸಾಚೆಂ ಆಚರಣ್
  • ಗಲ್ಫಾಚಾ ಇತಿಹಾಸಾಂತ್ ಪಯ್ಲೆಂ ಪಾವ್ಟಿಂ ಮಾಂಡ್ ಸೊಭಾಣ್ ಕಾರ್ಯೆಂ
  • ದಾಯ್ಜ್ಯಾಂ ಥಾವ್ನ್ ಗುಮ್ಟಾಂ ವಾಜೊವ್ಪಾಚೆಂ ಪ್ರದರ್ಶನ್
  • ಸ್ಟೇನ್ ಅಗೇರಾ ಹಾಚೊ ಮಟ್ವ್ಯಾ ಕಾಣಿಯಾಂಚೊ ಪುಂಜೊ 'ತಾಂಬ್ಡಿ ಮಿರ್ಸಾಂಗ್' ಮೊಕ್ಳಿಕ್
  • ಕೊಂಕ್ಣಿ ಮುಖೆಲಿ, ಸಂಘಟಕ್ ಡಯಾನ್ ಡಿ ಸೋಜಾ ಹಾಣಿಂ ಕೊಂಕ್ಣಿ ಸಂಸಾರಾಕ್ ದಿಲ್ಲಿ ಸೆವಾ ಮಾನುನ್ ಘೆವ್ನ್ ಉತ್ತೀಮ್ ಕೊಂಕ್ಣಿ ವಾವ್ರಾಡಿ ಪ್ರಶಸ್ತಿ
  • ಹೇಮಾಚಾರ್ಯಚಾ ನಿರ್ದೇಶನಖಾಲ್ ಮಿಕ್ ಮ್ಯಾಕ್ಸಾನ್ ಬರಯಿಲ್ಲೊ 'ಲೇಕ್ ತೆಂ ಲೇಕ್ ಚ್' ನಾಟಕಾಚೆಂ ಪ್ರದರ್ಶನ್
  • ದಾಯ್ಜಿ ದುಬಾಯ್ಚ್ಯಾ ಕೊಂಕ್ಣಿ ಸೆವೆಕ್ ಕೊಂಕಣಿ ಟ್ಯಾಲೆಂಟ್ಸ್ ಕುವೇಯ್ಟ್ ಹಾಂಚೆಥಾವ್ನ್ ಮಾನ್
  • ದಾಯ್ಜಿ ಮೆಲ್ವಿನ್ ರೊಡ್ರಿಗಸಾಕ್ 2006 ವ್ಯಾ ವರ್ಸಾಚಿ ಕೊಂಕ್ಣಿ ಕುಟಾಮ್ ಬಾಹ್ರೆಯ್ನ್ ಪ್ರಶಸ್ತಿ
  • ಮೆಲ್ವಿನ್ ರೊಡ್ರಿಗಸಾನ್ ಬೋಲಿವುಡ್ ಆನಿ ಸ್ಯಾಂಡಲ್ ವುಡ್ ಸಂಗೀತ್ಗಾರಾಂಕ್, ಗಾವ್ಪ್ಯಾಂಕ್ ಸಾಂಗಾತಾ ಘಾಲ್ನ್ ತಯಾರ್ ಕೆಲ್ಲ್ಯಾ 'ದಿಣಿ ದಿಣಿ' ಕೊವ್ಳೆಚೆಂ ಲೊಕಾರ್ಪಣ್

ದಾಯ್ಜಿ ವರಸ್-2007
  • ಎಪ್ರಿಲ್ 12 ತಾರಿಕೆರ್ ಸಂಘಟನಾಚಾ ಆಟ್ವ್ಯಾ ವರ್ಸುಗೆಚೊ ದೀಸ್ ಆಚರಣ್
  • ಮಾಲ್ಘಡೊ ಸಾಹಿತಿ ಆನಿ ದಾಯ್ಜಿ ಸಾಂದೊ ಜೆಮ್ಮಾ ಪಡೀಲ್ ಹಾಕಾ ಸನ್ಮಾನ್
  • ದಾಯ್ಜಿ ಪ್ರಕಾಶನಾಚೊ ಪಯ್ಲೊ ಬೂಕ್  'ರೆವೆಂತ್ ಫುಲ್‍ಲ್ಲಿಂ ಸಾಳ್ಕಾಂ' ಬೂಕ್ ಉಗ್ತಾವಣ್
  • ಲ್ಯಾನ್ಸಿ ಪಿಂಟೊ ನಾಯಕ್ ಹಾಚೆಥಾವ್ನ್ ಆಧುನಿಕ್ ನಾಟಕ್ ನಟನಾವಿಶಿಂ ತರ್ಭೆತಿ
  • ತುಳು ಮಾಂಚಿಯೆ ಕಲಾಕಾರ್ ವಿಜಯ್ ಕುಮಾರ್ ಕೋಡಿಯಾಲ್ ಬೈಲ್ ಆನಿ ರೋಹಿಣಿ ಜಯರಾಮ್ ಹಾಂಚೆ ಸಂಗಿ ಭಾಸಾಭಾಸ್ ಆನಿ ಸನ್ಮಾನ್
  • ಆರ್ಥರ್ ಪಿರೇರಾಚೊ 'ತಿಂ ದುಖಾಂ ಉಲಯ್ತಾನಾ' ಬೂಕ್ ಮೊಕ್ಳಿಕ್
  • 'ಕವಿತಾ ಟ್ರಸ್ಟ್' ಸ್ಥಾಪನ್

ದಾಯ್ಜಿ ವರಸ್-2008
  • ಮಾರ್ಚ್ 28 ವೆರ್ ದಾಯ್ಜಿ ದುಬಾಯ್ಚೊ ನವೊ ವಾರ್ಶಿಕ್ ದೀಸ್ ಆಚರಣ್
  • ಮಾಲ್ಘಡೊ ನಾಟಕಿಸ್ತ್ ಫ್ರಾನ್ಸಿಸ್ ಫೆರ್ನಾಂಡಿಸ್ ಕಾಸ್ಸಿಯಾ ಹಾಣೆಂ ಬರಯ್ಲ್ಯಾ 'ಮ್ಹಾತಾರೊ ಚರ್ಬೆಲಾ' ನಾಟಕಾಚೆಂ ದುಬಾಯಾಂತ್ಲೆ ಪಯ್ಲೆಂ ಪ್ರದರ್ಶನ್. ದಿಗ್ದರ್ಶಕ್ ಹೇಮಾಚಾರ್ಯ ಆನಿ ನಿರ್ಮಾಪಕ್ ಡಯಾನ್ ಡಿ'ಸೋಜಾ ಮುಕಾಮಾರ್. ದುಬಾಯ್ಚ್ಯಾ ಮಾಂಚಿಯೆ ಇತಿಹಾಸಾಂತ್ ಪಯ್ಲೆ ಪಾವ್ಟಿಂ ಲಗ್ಭಗ್ ದೇಡ್ ಹಜಾರ್ ಲೋಕ್ ಹಾಜಾರ್ ಅಸೊನ್ ನವೊ ಧಾಕ್ಲೊ.
  • ದಾಯ್ಜಿ ಪ್ರಕಾಶನಾಚೊ ದುಸ್ರೊ ಬೂಕ್ ಸ್ಟೇನಿ ಪಿಂಟೊ ನಿರುಡೆ ಹಾಂಚೊ 'ಜಿಕ್ಲೆಲಿ ಸಲ್ವಣ್' ಉಗ್ತಾವಣ್
  •  ದಾಯ್ಜಿ ಸಾಂದೆ ಪಿಯುಸ್ ಜೇಮ್ಸ್ ಡಿಸೋಜಾಚೊ 'ನಿಮಾಣಿ ಸೈರಿಕ್' ಆನಿ ಅಶೋಕ್ ಡಯಾಸಾಚೊ 'ಶೆಂಭೊರ್ ಕಿರ್ಣಾಂ' ಪುಸ್ತಕ್ ಉಗ್ತಾವಣ್
  • ತುಳು ಹಾಸ್ಯ್ ನಾಟಕಿಸ್ತ್ ದೇವದಾಸ್ ಕಾಪಿಕಾಡ್ ಹಾಂಕಾಂ ಸನ್ಮಾನ್
  • ರಚನಾ ಪ್ರಶಸ್ತಿ ವಿಜೇತ್ ಜೇಮ್ಸ್ ಮೆಂಡೋನ್ಸಾ ಆನಿ ಶೋಭಾ ಮೆಂಡೋನ್ಸಾ ಹಾಂಕಾಂ ಸನ್ಮಾನ್
  • ದಾಯ್ಜಿ ರಂಗ್ ಮಂದಿರಾಚೊ ತಿಸ್ರೊ ವಾರ್ಶಿಕ್ ದೀಸ್ ಆಚರಣ್
  • ಗಲ್ಫ್ ವಾಯ್ಸ್ ಆಫ್ ಮಂಗ್ಳುರ್ ಹಾಚೆ ಪಯ್ಲೆ ಆವ್ರತ್ತೆಂತ್ ರನ್ನರ್ ಅಪ್ ಜಾಲ್ಲ್ಯಾ ಡೊನಿ ಕೊರೆಯಾ ಆನಿ ಆಂತಿಮ್ ಹಂತಾಕ್ ಪಾವ್‍ಲ್ಲ್ಯಾ ಆಶಾ ಫೆರ್ನಾಂಡಿಸ್ ಹಾಂಕಾಂ ಸನ್ಮಾನ್
  • ಸ್ಟೇನ್ ಅಗೇರಾದ್ವಾರಿಂ ಮಂಗ್ಳುರಾಂತ್ ಕೊಂಕ್ಣಿ ಲೇಖಕಾಂ ಸಂಗಿಂ ಮಿಲಾಗತ್ ಆನಿ ಮಟ್ವ್ಯಾ ಕಾಣಿಯಾಂಚೆರ್ ಕಾರ್ಯಾಗಾರ್ ಆನಿ ಭಾಸಾಭಾಸ್
  • ದಾಯ್ಜಿ ವರಸ್-2009 ದಶಮಾನೋತ್ಸವ್ ಕಾರ್ಯಕ್ರಮಾಂ
  • ಜುಲಾಯ್ 20 ತಾರಿಕೆರ್ ಮಂಗ್ಳೂರಾಂತ್ ಕೊಂಕ್ಣಿ ಬರಯ್ಣಾರ್ ಆನಿ ತಾಂಚ್ಯಾ ಕುಟ್ಮಾಂ ಸಾಂಗಾತಾ ಸುಲ್ತಾನ್ ಬತ್ತೇರಿಂತ್ ದಶಮಾನೋತ್ಸವಾಚೆಂ ಉಗ್ತಾವಣ್
  • ಜಾಗತಿಕ್ ಮಟ್ಟಾರ್ ಕೊಂಕ್ಣೆಂತ್ ಮಟ್ವ್ಯೊ ಕಾಣಿಯೊ ಸ್ಪರ್ದೊ ಆನಿ ನಾಟಕಿಸ್ತಾಂ ಪಾಸೊತ್ ನಾಟಕ್ ಸ್ಪರ್ದೊ. ದೋನಿ ಸ್ಪರ್ದ್ಯಾಂನಿ ಶಾನ್ ಬೊಂದೆಲ್ ಹಾಕಾ ಪಯ್ಲೆಂ ಇನಾಮ್
  • ಕವಿಂಚಿ ಭೆಟ್ ಆನಿ ಕವಿಗೋಶ್ಟಿ
  • ಮಂಗ್ಳೂರ್ ಡೊನ್ ಬೊಸ್ಕೊ ಸಾಲಾಂತ್ ಪೆಭ್ರೆರ್ 14 ಥಾವ್ನ್ ಪೆಭ್ರೆರ್  17 ಪರ್ಯಾಂತ್ ಕೊಂಕ್ಣಿ ನಾಟಕ್ ಸ್ಪರ್ಧೊ. ರುಪಾಯ್ 50,000/= ನಗ್ದೆ ಇನಾಮಾಸವೆಂ 'ರತ್ನಗಿರಿಚೊ ಸರ್ದಾರ್' ನಾಟಕಾಕ್ ಪಯ್ಲೆಂ ಇನಾಮ್.
  • ದುಬಾಯಾಂತ್ಲ್ಯಾ ಕೊಂಕ್ಣಿ ಲೊಕಾಂ ಪಾಸೊತ್ ಕೊಂಕ್ಣಿ ತಾಲೆಂತಾಂ ಸ್ಪರ್ದೊ. 'ಫಾಮಾದ್ ಪೆರ್ನಾಲ್' ಪಂಗ್ಡಾಕ್ ದಿ. 3,000 ನಗ್ದೆಚೆಂ ಪಯ್ಲೆಂ ಇನಾಮ್
  • ಕೊಂಕ್ಣಿ ನಾಟಕ್ ಶೆತಾಚಿ ಸೆವಾ ಮಾನುನ್ ಘೇವ್ನ್ ಯುವನಾಟಕಿಸ್ತ್ ನೆಲ್ಲು ಪೆರ್ಮನ್ನೂರ್ ಹಾಕಾ 'ಯುವ ವಾವ್ರಾಡಿ' ಪ್ರಶಸ್ತಿ

ದಾಯ್ಜಿ ವರಸ್-2009
  • ಎಪ್ರಿಲ್ 28ವೆರ್ ದಾಯ್ಜಿ ಉತ್ಸವ್ ಆನಿ ದಶಮಾನೋತ್ಸವ್ ಆಚರಣ್. ಕಾರ್ಯಕ್ರಮಾಕ್ ಗಲ್ಫಾಂತ್ಲ್ಯಾ ಸಗ್ಳ್ಯಾ ಕೊಂಕ್ಣಿ ಸಮುದಾಯಾಚೆ ಮುಕೆಲಿ ಹಾಜರ್
  • ವೆದಿರ್  'ಕೊಮೆಡಿ ಸರ್ಕಸ್' ಮ್ಹಳ್ಳ್ಯಾ ಕಾರ್ಯಸವೆಂ ಕೊಂಕ್ಣೆಂತ್ಲ್ಯಾ ಫಾಮಾದ್ ಫೊಕಾಣಾಂಗಾರಾಂಚಿ ಮಿಲಾಗತ್ ಆನಿ ಹಾಸ್ಯ್ ಪ್ರದರ್ಶಣ್. ಹಾಂಚೆ ಪಾಯ್ಕಿಂ ಜೆರಿ ರಸ್ಕಿನ್ಹಾ, ದುಜೆ ಪಿಂಟೊ, ನೆಲ್ಲು ಪೆರ್ಮನ್ನೂರ್, ಆಲ್ವಿನ್ ವೇಗಸ್, ಡಯಾನ್ ಡಿ ಸೋಜಾ ಪ್ರಮುಖ್ ಜಾವ್ನಾಸ್ಲ್ಲೆ.
  • ದಾಯ್ಜಿ ಸಾಂದೊ ರೋಬರ್ಟ್ ಉದ್ಯಾವಾರಾಚೊ 'ಲ್ಹಾರಾಂ ಲಜೆಲಿಂ' ಬೂಕ್ ಮೊಕ್ಳಿಕ್
  • MCCP ಮಸ್ಕತ್ ಹಾಂಚೆಥಾವ್ನ್ ದಾಯ್ಜಿ ದುಬಾಯ್ ಸಂಸ್ಥ್ಯಾಕ್ ಸನ್ಮಾನ್
  • ರಚನಾ ಪ್ರಶಸ್ತಿ ವಿಜೇತ್ ಲಿಯೋ ಆನಿ ಶ್ರೀಮತಿ ಲಿಯೋ ರೋಡ್ರಿಗಸ್ ಹಾಂಕಾ ಸನ್ಮಾನ್
  • ಆರ್ಚ್ ಭಿಸ್ಪ್ ಅಂಬ್ರೋಜ್ ಮಾಡ್ತಾಕ್ ಸಂಘಟನಾ ಥಾವ್ನ್ ಸನ್ಮಾನ್
  • ದುಬಾಯ್ ಸಾಂಡುನ್ ಪಾಟಿಂ ಗಾಂವಾಕ್ ವೆಚಾ ಹೇಮಾಚಾರ್ಯಕ್ ಕೊಂಕ್ಣಿ ಪ್ರಶಸ್ತಿ ಆನಿ ಸನ್ಮಾನ್
  • ಹೇಮಾಚಾರ್ಯಚಾ ಸಂಪಾದಕ್ಪಣಾಖಾಲ್ ಮಂಗ್ಳುರಾಂತ್ ಇಂಗ್ಲಿಷ್ ಸಾತೊಳೆಂ ದಾಯ್ಜಿವರ್ಲ್ಡ್ ವೀಕ್ಲಿ ಸುರ್‍ವಾತ್. ಕರ್ನಾಟಂತ್ಲೆ ಪಯ್ಲೆಂ ಇಂಗ್ಲೀಶ್ ಸಾತೊಳೆಂ ಮ್ಹಳ್ಳೊ ಧಾಕ್ಲೊ.

ದಾಯ್ಜಿ ವರಸ್-2010
  • ಎಪ್ರಿಲ್ 9 ತಾರಿಕೆರ್ ಸಂಘಟನಾಚೊ ಇಕ್ರಾವೊ ವಾರ್ಶಿಕ್ ದೀಸ್ ಆಚರಣ್
  • ದಾಯ್ಜಿ ರಂಗ್ ಮಂದಿರ್ ಸಾಂದ್ಯಾಂಥಾವ್ನ್ ಸ್ಟೇನ್ ಅಗೇರಾನ್ ಬರವ್ನ್ ಪ್ರದೀಪ್ ಬರ್ಬೋಜಾ ಪಾಲಡ್ಕನ್ ನಿರ್ದೇಶಿತ್ ಕೆಲ್ಲ್ಯಾ 'ಕಸಲೆ ಗ್ರಹಚಾರ್ ಸಾಯ್ಭಾ' ನಾಟಕಾಚೆಂ ಪ್ರದರ್ಶನ್
  • ದಾಯ್ಜಿ ಪುರಸ್ಕಾರ್ ಶಾಸ್ವಿತ್ ಜಾವ್ನ್ ಮುಕಾರ್ಸುನ್ ವ್ಹರ್ಚ್ಯಾಕ್ ಬಾರಾ ಲಾಕಾಂಚಿ ನಿಧಿ ಸ್ಥಾಪನ್
  • ದಾಕ್ತೆರಾಚೊ ಘುಟ್ ಆನಿ ಹೆರ್ ಕಥಾ ಬುಕಾ ಸಂಗಿ ದಾಯ್ಜಿ ಸಾಂದೊ ವಿನ್ಸೆಂಟ್ ಪಿಂಟೊ ಅಂಜೆಲೋರ್ ಹಾಚಾ 'ಕತ್ಕುತ್ಲಿ' ಚುಟ್ಕುಳ್ಯಾಂ ಬುಕಾಚೆಂ ಮೊಕ್ಳಿಕ್ಪಣ್
  • HR ಆಳ್ವಾ ಆನಿ ಕನ್ಸೆಪ್ಟಾ ಫೆರ್ನಾಂಡಿಸ್ ಹಾಂಕಾಂ ಸನ್ಮಾನ್ ಆನಿ ಸಾಹಿತಿಕ್ ಮಿಲಾಗತ್
  • ಕೊಂಕ್ಣಿ-ತುಳು ಲೇಖಕಿ ಕ್ಯಾಥರಿನ್ ರೋಡ್ರಿಗಸ್ ಕಟ್ಪಾಡಿ ಹಿಕಾ ಸನ್ಮಾನ್ ಆನಿ ತಿಚೆಸಂಗಿ ಸಾಹಿತಿಕ್ ಮಿಲಾಗತ್
  • ದಸೆಂಬರ್ 17 ತಾರಿಕೆರ್ ಮಾಂಡ್ ಸೊಭಾಣ್ ಸಂಸ್ಥ್ಯಾನ್ ಅಸಾ ಕೆಲ್ಲ್ಯಾ ವಿಶ್ವ್ ಕೊಂಕಣಿ ಸಾಂಸ್ಕ್ರತಿಕ್ ಸಮ್ಮೇಳಾಂತ್ ದಾಯ್ಜಿ ರಂಗ್ ಮಂದಿರ್ ಸಾಂದ್ಯಾಂಥಾವ್ನ್ 'ಘಾಂಟಿಚಿ ತೋರ್' ನಾಟಕ್ ಪ್ರದರ್ಶನ್.
  • ಫಾಮಾದ್ ನಾಟಕಿಸ್ತ್ ಫ್ರಾನ್ಸಿಸ್ ಫೆರ್ನಾಂಡಿಸ್ ಕಾಸ್ಸಿಯಾ ಪಾಟಿಂ ಗಾಂವಾಕ್ ವೆತಾನಾ ದುಬಾಯ್ಚ್ಯಾ ಸರ್ವ್ ಕೊಂಕ್ಣಿ ಪರ್ಜೆಕ್ ಸಾಂಗಾತಾ ಘೆವ್ನ್ ಪರ್ಗಟ್ ಮಾನ್/ಸನ್ಮಾನ್
  • ದಾಯ್ಜಿ ಸಾಂದೊ ಸ್ಟೇನ್ ಅಗೇರಾಕ್ ಕೊಂಕ್ಣಿ ಕುಟಾಮ್ ಬಾಹ್ರೇಯ್ನ್ ಪುರಸ್ಕಾರ್
  • 'ದೋನ್ ಘಡಿ ಹಾಸೊನ್ ಕಾಡಿ' ದುಸ್ರ್ಯಾ ಆವ್ರತ್ತೆಚೆಂ ಪ್ರದರ್ಶನ್.
  • ಮೆಲ್ವಿನ್ ರೋಡ್ರಿಗಸ್ ಹಾಚ್ಯಾ 'ಪ್ರಕೃತೆಚೊ ಪಾಸ್' ಪುಸ್ತಕಾಕ್ ಡೊ| ಟಿ.ಎಮ್.ಎ.ಪೈ ಫೌಂಡೇಶನ್ ಆತ್ಯುತ್ತಮ್ ಕೊಂಕಣಿ ಪುಸ್ತಕ್ ಪುರಸ್ಕಾರ್.

ದಾಯ್ಜಿ ವರಸ್-2011
  • ಎಪ್ರಿಲ್ 29ವೆರ್ ಸಂಘಟನಾಚೊ ಬಾರಾವೊ ವಾರ್ಶಿಕ್ ದೀಸ್ ಆಚರಣ್
  • ಸಂಗೀತ್ ಸಾಮ್ರಾಟ್ ಹೆನ್ರಿ ಡಿಸೋಜಾಚಿ ಕೊಂಕ್ಣಿ ಸಂಗೀತ್ ಸೆವಾ ಮಾನುನ್ ಘೆವ್ನ್ 'ಜಿಣ್ಯೆ ಸಾಧನ್ ಪ್ರಶಸ್ತಿ' ಆನಿ ರುಪಯ್ 50000 ರುಪಯಾಂಚೆ ಇನಾಮ್
  • ಸ್ಟೇನ್ ಅಗೇರಾಚಾ ಫುಡಾರ್ಪಣಾಖಾಲ್ ದಾಯ್ಜಿವರ್ಲ್ಡ್.ಕೊಮ್ ಹಾಚೆಂ ಮಿಡಲ್ ಈಸ್ಟ್ ದಫ್ತರ್ ಉಗ್ತಾವಣ್
  • ದಾಯ್ಜಿ ಪ್ರಕಾಶನಾಖಾಲ್ ತಯಾರ್ ಜಾಲ್ಲೊ ಕ್ಯಾಥರಿನ್ ರೋಡ್ರಿಗಸ್ ಹಿಚೊ 'ಮಾನ್ ಲಾಸ್ತಾನಾ' ಬೂಕ್ ಲೋಕಾರ್ಪಣ್
  • ರೋನ್ ರೋಚ್ ಕಾಸ್ಸಿಯಾ ಆನಿಂ ಜೆರಿ ರಾಸ್ಕಿನ್ಹಾ ಹಾಂಕಾ ಸನ್ಮಾನ್
  • ದಾಯ್ಜಿ ಅಯೋಜಕ್ಪಣಾಖಾಲ್ ಡೊ| ಎಡ್ವರ್ಡ್ ನಜ್ರೆತ್ ಹಾಂಚೆಥಾವ್ನ್ ಭಲಾಯ್ಕೆ ಮ್ಹಾಹೆತೆ ಶಿಬಿರ್
  • 'ದೋನ್ ಘಡಿ ಹಾಸೊನ್ ಕಾಡಿ' ತಿಸ್ರ್ಯಾ ಆವ್ರತ್ತೆಚೆಂ ಪ್ರದರ್ಶನ್
  • ಮೆಲ್ವಿನ್ ರೋಡ್ರಿಗಸ್ ಹಾಚ್ಯಾ 'ಪ್ರಕೃತೆಚೊ ಪಾಸ್' ಕವಿತಾ ಬುಕಾಕ್ ಕೇಂದ್ರಿಯ್ ಸಾಹಿತ್ಯ್ ಅಕಾಡೆಮಿ ಪ್ರಶಸ್ತಿ

ದಾಯ್ಜಿ ವರಸ್-2012
  • ಎಪ್ರಿಲ್13 ತಾರಿಕೆರ್ ದಾಯ್ಜಿ ದುಬಾಯ್ನ್ ಆಪ್ಲೊ ತೆರಾವೊ ವಾರ್ಶಿಕ್ ದೀಸ್ ಆಚರಣ್ ಕೆಲೊ
  • ಸ್ಟೇನ್ ಅಗೇರಾಚೊ ಕಾದಂಬರಿ ಬೂಕ್  'ಹಿ ಮ್ಹಜಿ ಧಾಂವ್ಣಿ' ದಾಯ್ಜಿ ಪ್ರಕಾಶನಾತರ್ಫೆನ್ ಉಜ್ವಾಡಾಯ್ಲೊ
  • ದಾಯ್ಜಿ ರಂಗ್ ಮಂದಿರ್ ಸಾಂದ್ಯಾಂ ಥಾವ್ನ್ ಡಯಾನ್ ಡಿ'ಸೋಜಾನ್ ನಿರ್ದೇಶನ್ ದಿಲ್ಲೊ  ಕೊಂಕ್ಣಿ ನಾಟಕ್  'ಆಮಿ ನಾತ್‍ಲ್ಲ್ಯಾ ವೆಳಾರ್' ಹಾಚೆಂ ಪಯ್ಲೆಂ ಪ್ರದರ್ಶನ್. ಎಕಾಚ್ ಸಾಲಾಂತ್ ದೇಡ್ ಹಜಾರ್ ಪ್ರೇಕ್ಷಕಾಂಚೆ ಹಾಜರ್ಪಣ್.
  • ದಾಯ್ಜಿ ಸ್ಥಾಪಕ್ ಸಂಚಾಲಕ್ ಡಯಾನ್ ಡಿ'ಸೋಜಾಚಾ ಕೊಂಕ್ಣಿ ವಾವ್ರಾಕ್ ಆನಿ ಸಮುದಾಯ್ ಸೆವೆಕ್ ಲಾಗೊನ್ ಲಿಟ್ಲ್ ಫ್ಲವರ್ ಮುಕಾಮಾರ್ ಸಂಘಟನಾಥಾವ್ನ್ ಸನ್ಮಾನ್
  • ಸಂಗೀತ್ ಸರ್ದಾರ್ ವಿಲ್ಸನ್ ಒಲಿವೆರಾ ಸಂಗಿ ಮಿಲಾಗತ್ ಆನಿ ಹಾಕಾ ಸನ್ಮಾನ್

ದಾಯ್ಜಿ ವರಸ್-2013
  • ದಾಯ್ಜಿಚಾ ಇತಿಹಾಸಂತ್ ಪಯ್ಲೆಂ ಪಾವ್ಟಿಂ ಜಾವ್ನ್ ನವ್ಯಾನ್ ರಚನ್ ಜಾಲ್ಲ್ಯಾ ಉಡ್ಪಿ ದಿಯೆಸೆಜಿಂತ್ ಜನೆರ್ 22 ತಾರಿಕೆರ್ ಸಂಸ್ಥಾಪನಾಚಾ ಚೊವ್ದಾವ್ಯಾ ವರ್ಸಾಚೆಂ ಆಚರಣ್.
  • ದಾಯ್ಜಿ ದುಬಾಯ್ ಪ್ರಶಸ್ತಿ ವಿಜೇತಾಂಚೊ ಮಟ್ವ್ಯಾ ಕಾಣಿಯಾಂಚೊ ಬೂಕ್ ಮೊಕ್ಳಿಕ್
  • ದಾಯ್ಜಿ ರಂಗ್ ಮಂದಿರಾಥಾವ್ನ್ ಗಲ್ಫಾಭಾಯ್ರ್ ಪಯ್ಲೆಂ ಪಾವ್ಟಿಂ ನಾಟಕ್ ಪ್ರದರ್ಶನ್. ಸಂಘಟನಾಚಾ ಇತಿಹಾಸಾಂತ್ ಏಕ್ ಧಾಕ್ಲೊ.  'ಆಮಿ ನಾತ್‍ಲ್ಲ್ಯಾ ವೆಳಾರ್' ನಾಟಕಾಚೆಂ ದುಸ್ರೆಂ ಪ್ರದರ್ಶನ್
  • ಎಪ್ರಿಲ್ 27 ತಾರಿಕೆರ್ ಬೆಂಗ್ಳುರಾಂತ್  'ಆಮಿ ನಾತ್‍ಲ್ಲ್ಯಾ ವೆಳಾರ್' ನಾಟಕಾಚೆಂ ತಿಸ್ರೆಂ ಪ್ರದರ್ಶನ್
  • ಒಕ್ಟೋಬರ್ 25ವೆರ್ ದೋಹಾಂತ್  'ಆಮಿ ನಾತ್‍ಲ್ಲ್ಯಾ ವೆಳಾರ್' ನಾಟಕಾಚೆಂ ಚೊವ್ತೆಂ ಪ್ರದರ್ಶನ್
  • ನವೆಂಬರ್ 14ವೆರ್ ಅಬುಧಾಬಿ ಇಗರ್ಜೆಚಾ ನವ್ಯಾ ಬಾಂದ್ಪಾಕ್ ಆಧಾರ್ ಜಾವ್ನ್ 'ಆಮಿ ನಾತ್‍ಲ್ಲ್ಯಾ ವೆಳಾರ್' ನಾಟಕಾಚೆಂ ಪಾಂಚ್ವೆಂ ಪ್ರದಶನ್
  • ದಾಯ್ಜಿ ಮಂಗ್ಳುರ್ ಘಟಕಾಚೆಂ ಸ್ಥಾಪನ್ ಆನಿ ಸಿಜ್ಯೆಸ್ ತಾಕೊಡೆ ಹಾಚೊ ಪಯ್ಲೊ ಸಂಚಾಲಕ್ ಜಾವ್ನ್ ನೇಮಕ್
  • ದಸೆಂಬರ್ 1 ತಾರಿಕೆರ್ ಕಿನ್ನಿಗೋಳಿಂತ್ ಪಯ್ಲೆ ಪಾವ್ಟಿಂ  ಭುರ್ಗ್ಯಾಂಖಾತಿರ್ 'ಆಜ್ ಆಮಿ ಕೊಂಕ್ಣಿ ಉಲೊವ್ಯಾಂ' ಕಾರ್ಯಕ್ರಮ್
  • ದಾಯ್ಜಿ ಸಾಂದೊ ಸಿಜ್ಯೆಸ್ ತಾಕೊಡೆಕ್ 'ಸಂದೇಶ ಕೊಂಕ್ಣಿ ಸಾಹಿತಿಕ್ ಪುರಸ್ಕಾರ್'

ದಾಯ್ಜಿ ವರಸ್-2014
  • ದಾಯ್ಜಿ ದುಬಾಯ್ ಇತಿಹಾಸಾಂತ್ ದುಸ್ರೆ ಪಾವ್ಟಿಂ ದುಬಾಯ್ ಭಾಯ್ರ್ ಮ್ಹಣ್ಜೆ ಮುಂಬಂಯ್ತ್ ಜನೆರ್ 26 ತಾರಿಕೆರ್ ಪಂದ್ರಾವೊ ವಾರ್ಶಿಕ್ ದೀಸ್ ಆಚರಣ್
  • ದಾಯ್ಜಿ ದುಬಾಯ್ ಬೊಂದೆರಾಖಾಲ್ ನೆಲ್ಸನ್ ರೊಡ್ರಿಕ್ಸ್ ಆನಿ ಕುಟಾಮ್ ದುಬಾಯ್ ಪ್ರಾಯೋಜಿತ್ 'ದಾಯ್ಜಿ ರಂಗ್ ಮಂದಿರ್ -  ದೆ| ಮಿಕ್ ಮ್ಯಾಕ್ಸ್ ಉತ್ತೀಮ್ ನಾಟಕ್ ಬರಯ್ಣಾರ್ ಪುರಸ್ಕಾರ್' ಜಾಹಿರ್. ನವ್ಯಾ ನಾಟಕ್ ಕ್ರತಿಯಾಂ ಖಾತಿರ್ ಹ್ಯಾ ಇನಾಮಾಚಿ ಠರಾವ್ಣಿ.
  • ನವೀನ್ ಕುಂರ್ಬಿಲ್ ಹಾಚೊ 'ದೆವಾಚಾ ಭಾಗೆವಂತಾನೊಂ' ಬೂಕ್ ಉಗ್ತಾವಣ್
  • ಮೀರಾರೋಡಾಂತ್  'ಆಮಿ ನಾತ್‍ಲ್ಲ್ಯಾ ವೆಳಾರ್' ನಾಟಕಾಚೆಂ ಸವೆಂ ಆನಿ ಮಾಟುಂಗಾಂತ್ ಸಾತ್ವೆಂ ಪ್ರದರ್ಶನ್
  • ನವ್ಯಾ ಕಲಾಕಾರಾಂಕ್  'ಪ್ರತಿಬಿಂಬ್' ಮ್ಹಳ್ಳೆಂ ನಾಟಕ್ ತರ್ಬೆತಿ ಶಿಬಿರ್
  • ಆಕ್ತೋಬರ್10 ತಾರಿಕೆರ್ ಸ್ಟೇನ್ ಅಗೇರಾ ದ್ವಾರಿಂ ದುಬಯಾಂತ್ ಕಥಾ ಕಾರ್ಯಗಾರ್
  • 'ದೋನ್ ಘಡಿ ಹಾಸೊನ್ ಕಾಡಿ' ಚೊವ್ತ್ಯಾ ಆವ್ರತ್ತೆಚೆಂ ಪ್ರದರ್ಶನ್
  • ದಾಯ್ಜಿ ಮಂಗ್ಳುರ್ ಘಟಕಾಥಾವ್ನ್ ಭುರ್ಗ್ಯಾಂಪಾಸತ್  'ಆಜ್ ಆಮಿ ಕೊಂಕ್ಣಿ ಉಲೊವ್ಯಾಂ' ಕಾರ್ಯಕ್ರಮ್
  • ದಾಯ್ಜಿ ದುಬಾಯ್ ಥಾವ್ನ್ ಗೊಂಯ್ಕಾರ್ ಆನಿ ರಾಷ್ಟ್ರ್ ಮಟ್ಟಾರ್ ನಾಂವಾಡ್ದಿಕ್ ಜಾಲ್ಲೊ ಸಾಹಿತಿ ದಾಮೋದರ್ ಮೌಜೊಕ್ ಸನ್ಮಾನ್, ಉಲೊವ್ಪ್ ಆನಿ ಭಾಸಾಭಾಸ್
  • ಸಿಜ್ಯೆಸ್ ತಾಕೊಡೆಕ್ ಕೊಂಕ್ಣಿ ಕುಟಾಮ್ ಬಾಹ್ರೆಯ್ನ್ ಪ್ರಶಸ್ತ.
  • ದಾಯ್ಜಿ ದುಬಾಯ್ನ್ ಪರ್ಗಟ್ ಕೆಲ್ಲ್ಯಾ ಸ್ಟೇನ್ ಅಗೆರಾಚಾ 'ಹಿ ಮ್ಹಜಿ ಧಾಂವ್ಣಿ' ಕಾದಂಬರೆಕ್ AIKWO ಅಕಾಡೆಮಿ ಪ್ರಶಸ್ತಿ
  • ದಾಯ್ಜಿ ಅಂಡ್ರು ಡಿ ಕುನ್ಹಾಚಾ 'ಅಂಜುರಾಚಿ ಪಾನಾಂ' ಕವಿತಾ ಬುಕಾಕ್ AIKWO ಪ್ರಶಸ್ತಿ ಆನಿ ಕರ್ನಾಟಕ ಸಾಹಿತ್ಯ್ ಅಕಾಡೆಮಿ ಪುರಸ್ಕಾರ್.
  • ಯುವ ದಾಯ್ಜಿ ಸಾಂದೊ ಸ್ಟೇನಿ ಬೆಳಾಕ್ ಕಿಟಾಳ್ ಜಾಳಿ ಜಾಗ್ಯಾಥಾವ್ನ್ 2014 ವ್ಯಾ ವರ್ಸಾಚೊ ಯುವ ಸಾಹಿತಿ ಪುರಸ್ಕಾರ್
  • ಗಲ್ಫ್ ಮ್ಯೂಸಿಕ್ ಅವಾರ್ಡ್ಸ್ ಕಾರ್ಯಂತ್ ದಾಯ್ಜಿ ಆರ್ಥರ್ ಪಿರೇರಾಕ್ ಶ್ರೇಶ್ಟ್ ಪದಾಂ ಘಡ್ಣಾರ್( Best Lyricisit)ಪುರಸ್ಕಾರ್
  • ವಾಲ್ಟರ್ ನಂದಳಿಕೆಚಾ ಮುಖೇಲ್ಪಣಾಖಾಲ್ DAIJIWORLD 24x7 ಚಾನೆಲಾಚಿ ಸುರ್ವಾತ್

Tags:  Nanu Marol, Konkani Article, Thottam, Daiji Dubai, Konkani, Mangalore, Mangalorean, Mother Tongue

0 Comment/s.

Post your comments

Your email address will not be published. Required fields are marked *

Konkani English
Name  : 
Email  : 
Place  : 
Mobile  : 
I Am Human  : 
   Message :


Connect

Maibhaas

Within a short span of time, www.maibhaas.com made a niche in the hearts of Konkani readers with its clean reading, attracting design in Konkani media. www.maibhaas.com, a dream child of Naveen Sequeira Brahmavar, has able to create its impact and wonders from the day of its inception in Konkani world. As each day passing www.maibhaas.com is growing as a strong pillar of Konkani media.

Our Address
Mangalore

Contact Person :
Mr. Praveen Tauro

 Email : praveen@maibhaas.com

 Phone : +91 99 80 184340

 Address :
          Daijiworld.com,
          Airport Road,
          opp. Bondel Church,
          Mangalore - 575 008
          Karnataka - India

Our Address
Udupi

Contact Person :
Mr. Joel D'almeida

 Email : joel@maibhaas.com

 Phone : +91 90 08 855392

 Address :
          Eventz Redefined,
          Next to Vijaya Bank,
          Holy Family Complex
          1st Floor, NH -66
          Brahmavara - 576213

Our Address
Dubai

Contact Person :
Mr. Naveen Sequeira

 Email : editor@maibhaas.com

 Phone : +97 150 755 4105

 Address :
          Master Mind IT Solutions,
          UBL Building,
          #402, 4th Floor
          Bank Street - Bur Dubai
          Dubai - UAE